Psa 58 | MMX | STEP | Nemi luvuttadi amgomgo, kereva, mi lox akmokso levelinga at limixin mi loklok i nunuan? Kereva, mi ronga avukat levelinga atnedi la mi tu xantubu?

Psalms 58

Lisingising Ti Ne Moroa Na Lox Asongot Limixin Kapmek

1 Nemi luvuttadi amgomgo, kereva, mi lox akmokso levelinga at limixin mi loklok i nunuan? Kereva, mi ronga avukat levelinga atnedi la mi tu xantubu? 2 Kopmen tino. Mi doxoma mene ri leveloklok kakapmek mi lok do mina lox i, la mik lox asongot limixin at levengkot axap. 3 Limixin kakapmek dik lok laxakapmek at levenaleng axap at lorooro atdi; di paase asu amisik levelinga xaxarang, ga ru ka axa i at levenaleng diga visik di ren. 4 Loklok atnedi i umsu mi losomamao, di lok ngan laxasii xapmek, di song pe levenbaalung atnedi ngan ta lisii di so asen i mi la Kobra, levenbaalung atnedi i baa; 5 no xopmen nang tonga laxaka at laradi leklen at laxasii ik pixan kusu lisii naba ti, kopla at laradi ikleklen aleng levesangsanga. 6 O Moroa, una sak pirivit kepe leven gisangsa atnedi di lok ngan lubung laion. 7 Ba lox avukat do dina sonao ngan laxadan i sesen su axap, la dina lok ngan levempivilis dit pas amling i ro at langas. 8 Na ba lox avukat dina lok ngan levendemdem i remet la i rap sopso; la ngan lamdak mumulum nenen i visix amer i la kopmen bok ba na ven laxasep at laxangking.

9 Kovisi dinaklen i, la una lok kepe di ngan lempivilis di vixis asi i. Moroa, una mas kepe di mi lolos at lebelemamao ram do nedi move dina rooro. 10 Limixin mokmokso dinaba momo dola dina ven ne Moroa na lox asongot limixin kakapmek; la dinabat pas beles mi leveng kangkedek atdi ro xeneng at lada at limixin kakapmek, mo ne Moroa naba sev amet di. 11 La melemu limixin dinaba tong i do, “I ruturun do limixin mokmokso dik lok kaka luunun boro at ne Moroa; la i ruturun tinotno do ne Moroa mo i nemen la i viila mumu loklok at limixin at na lavatbung menemen.